يا وطن الغلب والغلابة
يا وطن أحلامه كدابة
صدقك هو وهمك
والكرامة مهانة
أملك يأس
وطيبتك ملهاش أمان
عدمك هو وجودك
وطموحك مغلوب
سعادتك حزن حزين
ضحكة ألم وأنين
حالك ميزان مقلوب

عودة للتدوين

الفترة دي اكتشفت اني بقالي فترة بعيد عن التدوين ..
وخليني اكون صريح كنت في فترة فعلا مش لاقي حاجة اكتبها ..
لكن حسيت ان الانسان لو مكتبش يعبر عن نفسه ممكن يطق ..
حتى لو عارف ان مش ناس كتير هتقرا كلامه
بس مجرد انه يعبر عن اللي جواه ده يحافظ على حالة التوازن والسلام الداخلي
ولما رجعت للمدونة لقيت حاجات كتير كنت سعيد بيها اوي من سنين ودلوقتي ممكن اعيد النظر فيها
بس محبتش امسح اي حاجة لإن ده في النهاية .. أنا ..

شـريــعــة ميــكـافيـللي

بسم الله الرحمن الرحيم 

{يَا أَيُّهَا الَّذِينَ آمَنُوا لِمَ تَقُولُونَ مَا لا تَفْعَلُونَ * كَبُرَ مَقْتًا عِندَ اللَّهِ أَن تَقُولُوا مَا لا تَفْعَلُونَ} 

الصف: 2- 3 

في الفترة الأخيرة بدأت تظهر جملة تطبيق الشريعة بشكل مكثف أوي لدرجة إن بعض المسلمين إبتدوا يحسوا انهم مش من البلد دي أصلا ... وكأن  الإسلام ده مقصور على تيار معين أو على فرد معين هو المتحدث بإسمه وكأن الدين محتاج شخص واحد او جماعة معينة متحدث رسمي بإسم الدين ... معتقدين على طول الخط إنهم الصح الواحد والوحيد وما حدش فيهم قرا الأية الجميلة اللي بتقول

{ قُلْ مَنْ يَرْزُقُكُمْ مِنَ السَّمَاوَاتِ وَالْأَرْضِ قُلِ اللَّهُ وَإِنَّا أَوْ إِيَّاكُمْ لَعَلَى هُدًى أَوْ فِي ضَلَالٍ مُبِينٍ}

سبأ: 27 

حتى القرآن في جداله مع الكفار مع القدرة البلاغية العظيمة في تفنيد أفكار الكفار ولكن تلاقي في جمله تيجي بتقول في نهاية الآية وإنا أو إياكم لعلى هدى أو في ضلال مبين 

ولو إفترضنا دعوة غير المسلمين للإسلام فدينا بيأمرنا بدعوة غير المسلمين بالحكمة والموعظة الحسنة , فعاوز بقى أسأل سؤال هنا ... يا ترى هنلاقي التيارات اللي بتسمي نفسها إسلامية (واللي هتفق معاكم على تسميتها في باقي المقال بالتيارات الدينية أو اليمينية) فين من الكلام اللي فات ده ؟

هل فعلا هما بيدوروا على تطبيق الشريعة ؟ ... لا أنكر أن هناك صادقون مخدوعون بحديث قيادات هذه التيارات عن تطبيق الشريعة وما إلى ذلك , بس خلينا نتفق هنا ان كلامي على قيادات المجموعات دي ... مجموعة صنع القرار 

هل المجموعة المسيطرة على الحركات والجماعات والاحزاب الدينية في مصر فعلا بتدور على تطبيق الشريعة 

طب مش اللي بيدور على تطبيق حاجة يطبقها على شخصه قبل أي حد تاني 

ولا هما بيطبقوا شريعة ربنا على الناس وهما ليهم احكام تانية وطريقة تفكير تانية 

أنا من خلال المقال ده هقارن معاكو بعض المواقف بمقتطفات من كتاب الأمير لميكافيللي وهنشوف هل شريعة ربنا اللي بتحصل في المواقف دي ولا شريعة ميكافيللي 

بس قبل ما نبص مع بعض على مقتطفات من كتاب الأمير وانا براجع معلوماتي عن ميكافيلي قريت جملة في اقواله في الصفحة المكتوبة عنه ع الويكيبديا لقيت الجمله دي 

حبي لنفسي دون حبي لبلادي وبناءاً عليه حبيت انكم تسمعوا الفيديو ده (http://www.youtube.com/watch?v=psFUl0mCeY8)

"أثبتت الأيام أن الأنبياء المسلحين أحتلوا وأنتصروا، بينما فشل الأنبياء غير المسلحين عن ذلك"

 ... بداية من الجماعة الاسلامية وجماعة التكفير والهجرة وحتى الاخوان المسلمين الذين حملوا السلاح ضد العدو الصهيوني في حرب 1948 ولكنهم حملوه مره اخرى ضد اثنان من رؤساء وزارات مصر على التوالي وضد رئيس بعد ذلك "جمال عبد الناصر" بإعتراف مهدي عاكف شخصيا ...

مرورا بقى بكم مهول من العمليات الارهابية في التمانينات والتسعينيات

ولو بصينا على التحالف اليميني اللي موجود ف مصر اليومين دول هنلاقيهم كلهم بيطبقوا المبدأ اللي فوق ده

والاتحادية ليست عنا ببعيد

"لا يفتقر الأمير أبداً للأسباب كي يكسر بوعده"

وده مبدأ أصيل عند السلطة الحاكمة في مصر وهي جماعة الاخوان

هم دائما لديهم مجلدت من التبريرات لكسر أي وعد قطعوه على أنفسهم

دايما الاخوان مش بيوعدوا بحاجة ويخلفوها إلا  وتجد المبرر موجود الأول ... رشحتوا خيرت الشاطر ليه مش قولتوا مش عاوزين نرشح حد ... البرلمان مش كنتو مش طمعانين فيه ؟ ... وبعدين محمد مرسي قال معندوش مشكلة ان يحصل اعادة تشكيل للجنة التأسيسية .. وقال مفيش دستور هينزل الاستفتاء بدون توافق الجميع ... وغيره وغيره وغيره من الكلام اللي راح ف الهوا

"ان الدين ضروري للحكومة لا لخدمة الفضيلة ولكن لتمكين الحكومة من السيطرة على الناس"

قولوا نعم للدين .. ولا للالحاد والعلمانية والكفر

قولو نعم تدخلوا الجنة

(إستفتاء مارس 2011)

انا معترض على بعض المواد في الدستور وهعتصم في التحرير

مليونية الشرعية والشريعة

على فكرة محدش جاب سيرة الشريعة !!

سبتمبر 2012

مع كل الوقت ده من الديمقراطية مازال اليمين المصري يستخدم نفس المصطلحات ونفس الاتهامات الدينية الباطلة

واللي هي بحكم الدين بقى وبحكم قال الله وقال الرسول تنطبق على مطلقيها

قال رسول الله صلى الله عليه وسلم ‏:‏ ‏”‏إذا قال رجل لأخيه‏:‏ يا كافر، فقد باء بها أحدهما، فإن كان كما قال وإلا رجعت عليه‏”‏ ‏(‏‏(‏متفق عليه‏)‏‏)‏‏

يتبع ...

خمس سنين

النهاردة
خمس سنين على المدونة دي
كتبت فيها حاجات كتير
في العك
والتهييس
والجد
والإحساس
والتفكير
سنتين مكنش في أي حاجة من ده كله
2010
2011
ايه السبب
مش هحاول اعرف
ومش عاوز اعرف
كل اللي هفكر فيه اني اكمل ف المدونة دي
لأني بقيت حاسس انها فعلا جزء مني

حنين

عندما يأتي الحنين مشتاقاً إلي
ويَخْرُج اليأسُ دمعاً من عيني
أكون قد بسطت يداً إلى مستقبل
أدبر إلى ماضٍ لعين
كصعاليك لا تظهر إلا بليل
حنين إلى وطن .. أبي
يرفع رأسي بالمجد إلى أعلى
ويهديني نصراً قد أقبل
غير مستكيناً لصهيون في وضعٍ مهين

قصاصات دفتر ... غير مكتملة -5

ابيسوديون

لماذا ؟؟
لماذا كنتِ متعنتة ايتها العقائد الشعبية البالية
لقد كفرت بكل تابوهات هذه المجتمعات الفانية
أبدية الروح اللامحكومة هي القانون
ولا مشيئة تسري لأوثان العقائد البلهاء
والعادات السقيمة الشنعاء
لا الفكر له حد يحده البشر
ولا الروح لها حد يحده البشر
كل الحدود مقصور رسمها على خالق البشر

...
...

ربما كان المنطق الشخصي
دافعا لكل الاهوال التي تعرض لها
فمنطقه لا القرناء تحملوه
ولا البشر
ولا احرار الجان
ولا كائنا من كان

...
...

ثبات ضمير
وغيبوبة عن الامر الواقع
ولا وعي بمستجدات الامور
هو هناك بعيدا
عن حيث يكون الأخرين

قصاصات دفتر ... غير مكتملة -4

بـــارودوس
البلياتشو

لما ايها الانسان ترتدي الأقنعة
تلهو
تبكي
تضحك
خلف جدران ...
تبقى في الحيا
حيران ...
وسؤال بلا جواب
لحياتك عنوان
...

تراك في الطرق
ليلا
تجري
تمشي
وربما تقطعها
حبوا
او زحفا
...

هائما في الصحراء بلا أمتعة
منك الشمس تدنو
والرمال تحمو
وتبقى
متخفيا خلف القناع
تصر على الخداع
...

ايها البلياتشو الحزين
إبتسامتك ليست صادقة
جراحك .. أعلم .. غائرة
دمعك
يكاد يفجر أنهارا جارية
...

صديقي البلياتشو
العرض انتهى
كما يبدو

قصاصات دفتر ... غير مكتملة - 3

إيسودوس 2 - مدخل 2

الرب ميكافيلي

بعضهم يرى ان الميكافيلية في هذه الأيام
هي عقيدة عامة
بل ان بعض يرى ان هناك من أله ميكافيلي
فالغاية دوما تبرر الوسيلة
هرطقة لا غير
ترددت في اجواء المكان

...
...

أبصر في مذكرته الأنيقة
رقما يعلوه إسما ..
اه .. يالها من ذكرى مخزية
كان يريد ان يحفتظ به كصديق
ربما تذكر مواقف كثيرة وقف فيها الى جوار هذا الاسم
حاول ان يفتش عن ذكرى واحدة تحمل خيرا منه
لم يجد
لم يعر الامر انتباها
اكثر من هذا
قام وادخل المذكرة في جيبه
واكمل المسير ...

...
...

في هذا الساعة المبكرة من الصبيحة الشتوية
تبدو شوارع وسط المدينة
كإحدى طرقات لندن الضبابية
كان يطرقها أناس قليلون في هذا الوقت
استعدادا للأفواج البشرية التي ستظهر
في هذه الشوارع مع دقات الساعة السابعة
وما يليها

...
...

أثناء مسيره كان عيناه تتلاقيان
مع اعين المارة المقبلين عليه
ربما لم يستمر اللقاء لثاينتان او اكثر بقليل
ولكنها كانت تعطي معان كثيرة للطرفان
في حينها
فبالتأكيد الامر لم يكن يستقر عند الطرف الاخر انتهائه
سوى ثوان
لكنه كان يفهم الكثير والكثير
ويعيد ما فهمه في رأسه
فهذه اعين حزينة ... وهذه اعين ساهرة
.. وهاتان عينان تهربان من الديون
ربما لو اتيح له ان يتحدث مع كل شخص يمر بجواره
ان يتحدث مع لذات الثوان
ما استشف كل هذه المعان

...
...

إمرأة عجوز .. افترشت الطريق
جلست في ستر احدى الاشجار
تبغي حسنات المحسنين مقابل عبوة من المناديل
غاص بيديه في جيبيه ... يبحث عن شيء
لهذه المرأة التي نخر مظهرها نياط قلبه
لكنه لم يجد سوى بقايا " فتافيت " قطعة " بقسماط "
كانت اخر قطعة في كيس كان اشتراه من يومان
بأخر نقود كان في جيبه
وتذكر حينها انه لم يطرق باب بيته
منذ عدة ايام
ولم يصبه داء النوم منذ فترة تعدت اليومين

...
...

تخطى المرأة وهو يشعر بغصه في حلقه
ومرارة تركها في هذا الوضع تعتصر قلبه
وتذكر مقولة كانت في ذات الصفحة التي
أبصر فيها الرقم والإسم
وكان صاحب الإسم هو كابتها
" بالقسوة ينبغي التعامل في كل مرة "
مبدأ ميكافيلي ...
وعاد يفكر في هؤلاء .. أتباع ميكافيلي
الذين صاروا الان اكثر من البشر الطبيعيين
وتذكر أمه
وتذكر حبه

وتذكر ...

قصاصات دفتر ... غير مكتملة -2

إيسودوس - مـــدخــل
-

الأميــر ...

كان يتمدد اما شاشة التلفاز
محاولا ان يخرج من الحالة التي دخل اليها
رسمت اشعة التلفاز .. في هذا الظلام
الدامس ..
على وجهه ألوان .. ربما عبرت
عن جزء ضئيل
لا يتعدى جزء من مليون جزء
من المشاعر المتضاربة
بداخله ..

...
...

نزل الى طرقات القاهرة ..
التي عادة لا تكون مزدحمة ..
في مثل هذه الساعة المتأخرة
لا يدري لما أحس ..
انه يكاد يختنق من الزحام ..
توقف للحظات ونظر حوله
لا أحد

...
...

جلس على " دكة " من الكثير
المنتشر على رصيف " الكورنيش "
حاول ان يستنشق الهواء النقي
لساعات الصباح الاولى على ضفاف النيل
كان مغمض العينين ..
نظر بهدوء مرة أخرى إلى مجرى النهر العظيم ..
لا شيء ...

...
...

رفع هاتفه الخلوي ..
ضغط بضعة أزرار ..
وضعه على أذنه
جاءه صوت الرنين ..
لكن لا مجيب ...
لم يعط اي ردة فعل ..
فقط ألقى الهاتف في جيبه
ومضى ..

...
...

كان يستطيع بأيدولوجيا مختلفة
ان يقابل حياة أفضل
كان دوما يريد ان يصبح أميرا ..
لكنه لسوء حظه

لم يطالع كتاب Il Principe الأمير ..
ليطلع على مقولة ميكافيلي الخالدة
A prince never lacks legitimate
reasons to break his promise
فالامير دوما ...
لا يفتقر للأسباب المقنعة
لكسر أي وعد
أي وعد
أو حتى أي قانون .. أو قاعدة

...
...

سحب من جيب سترته
دفتره الأنيق
ذو الغلاف الجلدي الانيق
وهذا القلم الصغير المثبت في طرفه ..
وكتب ملاحظة
ربما لم ألاحظها انا ..

قصاصات دفتر ... غير مكتملة -1

برولوجوس

منذ فترة طويلة لم يخرج قلما ويكتب
ربما أحس اليوم فقط برغبة عارمة للكتابة
لا يدري لماذا الان فقط يشعر برغبة عاتية
للكتابة
الكتابة وفقط
ربما لو اطلقت يداه في مد البصر من الورق
وملئ البحار مدادا لإنطلق في الكتابة
دون توقف
إلى مالا نهاية

...
...

انتابته لفترة من الفترات بعض المشاكل
الطفيفة
حقيقة الامر انها لم تكن طفيفة
لكنها لم تكن اكثر من طفيفة
لا لا لا ... الامر لم يكن واضحا
هو نفسه لا يدري ماذا حدث
ولا يدري كيف حدث
حدث حدثت نهايته
قبل البداية ببضعة خطوات ..

...
...

في أمسية أول أمس
كان يرغب في كتابة بضعة وريقات
كان يشعر بصداع رهيب
يكاد يفجر رأسه

...
...

رشفات من فنجان قهوة " يوناني "
لم يجدي نفعا ..
هناك شخص ما
في اعلى الجزء الايمن الخلفي لرأسه
يمسك بمطرقة فولاذية
يطرق بها بشدة على اعصابه

...
...

انتفض مستيقظا من ثباته
فقد نام على غير وعي منه
ماذا رأي في هذا الكابوس ..
Déjà vu لقد شاهد هذا المشهد من قبل
ربما عاشه من قبل
ربما كان كل ما هنالك ان عيد المشهد
امام عقله اللاواعي في نومه
...
...

إذا كان الامر على هذا القدر
من القسوة
لماذا انتفض له عقله اللاواعي
بينما لم يهتز من عقله الواعي
حينها
شعرة ..
...
...
هناك في الحياة
أمور دوما

تعجب ... لها !!

يتبع

الأميرة

يا أميرة همسات الرقة
في وصفك
تدفقت الكلمات كالأنهار
في ذكرك
نضبت كل الاشعار
من أنتي
وكيف جئتي
ومتى
ولما
لا تسأل
فقط اعلن ايمانك واعترف
ليست كالناس
ولا الملائكة
بل تختلف

دقات القلب
تشدو باذكار حبها
تسمو الروح لأجلها

وتبقين
لديوان حياتي
إسم وعنوان
قصيدة البيان

انشودة
أرتلها حين اكون
وحيدا بين الجدران

الكـــوســة

للحظة ما شعرت ان كلمة " كوسة " هي كلمة (( أبيحة )) بإعتبارها تتكون من مقطعين
كو - سا واذا علمنا ان " سا " في المصرية القديمة تعني إبن فبالتالي المعنى المنطقي يصبح
" إبن الكو "
وبالتالي حتى افهم المعنى الدقيق للكلمة بحثت بحثا مستميتا وقاتلا

حتى اتضح لي
ان الكوسة

للأسف
تعتبر

من الخضراوات

للأسف


يعني مش شتيمة ... يا خسارة
وتعتبر الكوسة من الاشياء التي لا احبذ اكلها ولا احبذ طبخها ولا احبذ التعامل معها على الاطلاق
إلا اني اكتشفت اني للأسف اتعامل معها بالعافية وغصب عن عيني
حيث اتضح لي اثناء رحلة بحثي عبر الانطرنط ان البطيخ والخيار والكوسة ينتمون لذات العائلة
الخضارية والتي سأسميها الكوسيات
يعني البطيخ من نفس عيلة الكوسة !!! حاجة كوسة خالص

وتعتبر الكوسة من الخضروات الغنية جدا بالفايتمينات والذي منه ولكنها تفقد كل ده بسبب الحرارة
بتاعة الطبخ ( دي مش فقرة ابلة نظيرة كمل التوبك )

عشاااان كده بقى
ارتبط اسم الكوسة ... بالــ " كوسة "

بمعنى ان تلاقي واحد بيشتغل وطالع عينه وإذ فجأة كل اللي عمله يروح عشان ياخده حد تاني
زي مثلا كده
اما تكون انتا خريج وجايب جيد ولا جيد جدا مثلا بضرب النار ومموت نفسك كورسات واشياء من هذا القبيل
وتقدم على وظيفة وتلاقي كل اللي عملته راح بسبب حرارة الجو او حرارة الوسطة
او حرارة الفلوس
وياخد الوظيفة واحد تاني طالع بمقبول من معهد ام جلانبو

وتحت وطأة الظروف دي خرج الشعب المصري بمفردة مميزة جدا
الا وهي
كوسة
اي حاجة بتحصل
كوسة
حد اشتغل
كوسة
حد اترقى
كوسة
حد كسب
كوسة
حد خسر
كوسة
حد مات
كوسة
حد عاش
كوسة
بقت كل حاجة كوسة

ولذلك قال قائل
ان العالم المصري اكتشف ان النيل لو كان صلصة
مكنش كفى الكوسة اللي ف مصر

ونظرا لأن المجتمع بلغ من القيم مبلغ لا يسمح بترديد مثل هذا اللفظ النابي
فقد شعرت انه كان لزاما وواجبا علي التحقق من معاني مفردة " الكوسة "
لعلها احتوت بعض المعاني الـ " أبيحة " ولكن الحمدلله اخواني
اطمئنكم
بمنتهى الثقة
ان الكلمة ليست بالكلمة النابية

بين الدكتاتورية والعنصرية من باب النقد الذاتي

في واقع الأمر ... لقد سئمت علميات التجميل والتنفيخ والتخسيس التي نجريها على مجتمعنا وعلى الأداء المجتمعي المجمل ...
م الاخر يعني إتيييييييييييييييييييت ... وجريا على العادة والموضة و الحداثة إنضممت إلى قائمة الإتنين وتمانين مليون " اللي هما احنا يعني " المطالبين بالمزيد من الديموقراطية والمطالبين بالمزيد من الحقوق والحريات إلخ إلخ إلخ م الكلام اللي بنصحى ننام نسمع فيه ده
تفتح راديو .. تلفزيون .. نت .. جرنال .. شباك .. حنفية
هتلاقي الكلام ده في وشك
الغريب
إننا كمجتمع
مجتمع دكتاتوري
يا ريتنا حتى بنتعامل كمجتمع بحرية زي الحرية المتاحة لينا في التعبير عن الرأي
لا .. إحنا دكتاتوريين .. وياريتنا مجتمع دكتاتوري بس .. لا إحنا مجتمع من غلاة الدكتاتوريين
وعلى سبيل المثال لا الحصر والإلمام
كم من الافكار وأدت " جست بس انها مش ملائمة تقااااااااااليد المجتمع "
تقاليد ايه وبتنجان ايه بس
ده احنا لا محافظين على تراث ولا تاريخ ولا اي حاجة
واي كلمة يقولك عادات وتقاليد
عادات ايه بس وقرف ايه
وبعدين عادات اييييييه دي اصلا اللي تتحكم في تفكيري !!! ؟؟؟! !!!
ناقصه هي تخلف وتدهور !!!
انا ليا حاجتين ديني بعده قانون بلدي ...
ارجع تاني لموضوع الحرية
فتلاقي المجتمع قمعي لأي حد بيفكر بشكل مختلف
قمعية المجتمع تتمثل في ايه
في سخرية
في تريقة ( حد يقولي في فرق بين السخرية والتريقة اقوله لأ :d )
في إحباط
في تثبيط همة
في تقفيل سكك
إلخ إلخ إلخ من الوسائل المتعددة في قمع كل ما يود المجتمع ان يقمعه

إلى كل من يألمون لضيق مساحة الحرية في مصر
إلى كل من يطالبون بالمزيد من الحريات
إلى كل من يطالبون بالمزيد من الديموقراطية

أيها السادة
هناك على أرض مصر 82 مليون دكتاتور
واجهوهم أولا
ثم طالبوا بالحرية

ومن هنا
ومن هذا المنبر الإلكتروزي
أطلق مبادرة للقضاء على 82 مليون دكتاتور
واحب اقولكم اني قضيت على اول دكتاتور
اللي هو انا :d

إبدأ بنفسك هتلاقي العالم إتغير

....
..

وبالمناسبة تكمل بقى
ماهو احنا مش دكتاتوريين بس
لا إحنا كمان عنصريين
لحد دلوقت السنيما " المتخلفة " بتصور على سبيل المثال
الصعيدي الكائن الغبي الاحمق الاخرق اللي جاي من ورا الـ .... وده وان دل فإنما يدل على غباء
الغريب
ان فعلا المجتمع لسه باصص نفس البصة دي للصعيد
يا ساتر على الناس
طب سؤال يعني
هي مصر ايه اصلا ولا كانت هتبقى ايه من غير الصعيد
اذا كان حضارة مصر كلها في الصعيد
اللي بنوا الحضارة دي هما اهل الجنوب
يعني مدينة واحدة بس في الصعيد الاقصر فيها تلتين اثار العالم
مصر بقى دلوقتي اصلا
ايه لزمتها غير حضاراتها اللي كان اهل الجنوب فيها هما الاساس وحجر الزاوية
وبعدين حتى في العصر الحديث يعني شوية اسماء م الويكيدبديا
مصطفى لطفى المنفلوطى اسيوط
مجدى يعقوب اسيوط
حافظ ابراهيم اسيوط
البابا شنوده التالت اسيوط
جمال عبد الناصر اسيوط
سوزان مبارك منيا
طه حسين منيا
لويس عوض منيا
هدى شعراوي منيا
عبد الحكيم عامر منيا
جيهان السادات بنى سويف
الشيخ محمد سيد طنطاوىسوهاج
رفاعه الطهطاوي سوهاج
مكرم عبيد قنا
امل دنقل قنا
عبد الرحمن الابنودى قنا
عبد الباسط عبد الصمد قنا
عباس محمود العقاد اسوان
خليل عبد الكريم اسوان
كلها اسماء اصلا كل اسم علامة ف التاريخ المصري المعاصر

ليه لسه في ناس بالذات في السنيما والإعلام عاوزة تعمل الفرق ده وتوسعه
وليه احنا مجتمع ساذج بالشكل ده ونلبس نفسنا قناع عنصري مقرف اوي
ليه ؟؟

موقف كده قبل ما اكمل كلامي
كنت راكب الميكروباص في مرة بالليل مروح اكتوبر كالمعتاد
الميكروباص واقف بيحمل
قاعد في الكنبة اللي ورا
شابين صوماليين تقريبا واحد فيهم أصم ... شوية وجت اسرة راجلين ومرتاتهم ( زوجاتهم يعني )
فالسواق استئذن الشابين اللي ورا يطلعو يقعدو قدام عشان الناس دي تقعد جنب بعضها
المهم نزل واحد منهم ووقف بيشاور للتاني يعني انه ينزل بيفهمه بلغة الاشارة
بس ونزل الاتنين وركب الناس اللي جم دول ... وإذا بالكلمة اللي خلتني عاوز ارتكب جناية
جتك القرف ... زي وشك ... قرفتونا ومزاحمينا ف بلدنا
الست للحظة حست انها تنفع احمد عرابي او سعد زغلول

حاولت اشوف معنى للكلام ده الصراحة مالقتيش
بالمناسبة معلومة عشان كل الناس اللي مفكرة ان اللاجئين اللي في مصر بياخدوا فلوس من مصر
لا دول بياخدوا فلوسهم من المفوضية الاوربية ومفوضية الامم المتحدة

طبعا حد هيقولي ده تصرف فردي
لا مش فردي
والناس دي بتشبع ف البلد دي معاملة زي الزفت منا

من سنتين كان ساكن فوقينا عيلة صومالية
العلية دي
اترمت في الشارع بمعنى الكلمة من صاحب الشقة
لأنهم إتأخروا في دفع الايجار .. ده طبعا لأن دخلهم بتحصل في مشاكل الدنيا كلها
لأنه من جهات تطوعية
لكن الراجل ما قدرش ظروفهم ولا حالتهم واقتحم البيت الساعة واحدة بالليل
وطردهم من البيت في عز الليالي

وبعد كده نقول ليه المصري بره بيتعامل معاملة زي الزفت
من اعمالكم سلط عليكم
وكتير وكتير

تيجي للأنقح من كده
تبص ف الجامعة تلاقي شلل مسلمين بس .. شلل مسحيين بس
ايه ده ؟؟؟
ايه العك ده ؟؟؟
بجد حاجة تشل
وتوجع الدماغ

وصدقوني طول ما احنا عايشين كده
في حالة " النفاق دي "
صدقوني
مش هنتقدم خطوة واحدة !!

والحل ايه ؟؟؟

الحل .. هو الحل اللي بعتبره حل كل المشاكل
الحل فيك انتا
في نفسك
انتا ابدأ بنفسك
من جواك انتا
التغيير هيوصل العالم كله
بس إبدأ انتا

أنا هبقى ديموقراطي في تعاملاتي مع الناس
عشان احلل حبة الحرية اللي عندنا

وقررت اني معنديش استعداد اني ابص لأي حد في مصر على انه اقل مني
خصوصا لو كان مصري
لازم نقدر بعض اكتر من كده
وزي ما قولت انا من هنا ورايح كل الناس ايا كانت افكارهم ايا كانت اصولهم
ايا كانت اشكالهم ففي الاخر احنا مع بعض
على نفس الارض
طالما مش بيخطط انه يأذي بلدي
يبقى هو زيه زيي

يا ريت بجد كل واحد يبدأ بنفسه
لأن احنا الشباب
الامل
إحنا النهاردة وبكره
وإحنا بس اللي في إدينا

نخلي مصر ... تبقى احسن

المرستان

اضحك يا معلم
بيقولك مصر بقت مرستان
شوف وبص واتعلم
اصول الوصول وشغل الجنان
حرامي قصادي
من يومين
ممسوك ف
كبشة قواضي
سبحان مغير الأحوال
في اقل من تقريبا وحوالي
دلوقت ما شا الله عليه
مسئول كبير
قد الزير
وكل علامات النبل بدت عليه
راجل امير
الناس يبوسه الارض بين ايديه
واللي يقوله يا باشا
واللي يقوله يا بيه
وباظت البلد
وبقى النصاب صاحب مقام
والحرام اسمى ايات الغرام
...
..
وبعد تنت وتنتين سنة
قالوا الحال هيتبدل
والامور هتبقى عاااااال
والحياة اخر جمال
اتريها فوق دماغنا بتتقندل
بعد السنة والسنين
لا في مال ولا حتى بنين
والحالة حضيض
جابت اخرها ع الحديد
والجبل اتهد
وخلاص مبقاش في سد
ده زعلان وساكت
وده بيتفرج
حاطط ايد على خد
ويوم ما يتكلم احد الصناديد
يقولك فلان وعلان حطوهم ف الحديد
اصل هما سبب الازمة
وامريكا واوباما مش هينقذونا ليه
ولا هما ما لهمش لازمة

ونصقف ونقول الله الله يا عم الزعيم
ولا حد فاهم حاجة
يا جماعة التغيير مش من هناك
دي حاجة سوبر مش عادة
يعني لازم تشتغل وتتعب
مش كل ما تلاقي فرص للنصب
تنهب
خليك صالح مواطن
خلي بلدك
همك
حلمك
اغلى من روحك ودمك
مهما طلعت ولا نزلت
مصري
هو ده اسمك

أحلام

بما اني انا عدو النوم
لأأني بعتبر ان وقت النوم ده وقت ضايع
فأنا أحلامي كلها وانا صاحي
اللي بيقول عليها معشر الناس اللي بينامو أحلام اليقظة
الحلم يا جماعة هو العالم اللي ببنيه بنفسي لنفسي
ببنيه وانا عارف انه ممكن ما يتحققش بالكامل
ممكن حاجة منه تتحقق لكن مفيش حد بينجح
انه يحقق عالم احلامه بالكامل
إلا إذا كان بيحلم بالواقع

الجزء السلبي من أحلام اليقظة ان الواحد يسوق فيها
وينسى الواقع بتاعه
ويعمل عبده العبيط
ويوهم نفسه بأي حاجة مش هتتحقق اصلا لأن واقعه زي الزفت
بس هنا لازم نفرق بين الحلم والوهم
الوهم ان حد يعيشك في جو مش حقيقي
حد هو اللي يبني أحلامك ولكن على لا شيء
الوهم هو الجو الأسطوري وجو الأفلام الهندي
الغير موجود اللي بيعيشوهلنا بتوع الحكومة وحتى المعارضة والإخوان
الوهم هو كل كدبة حد كدبها على شخص بريء
الوهم هو كل بنا مبني على اساس مش موجود

وانا شخصيا من النوع اللي عايش على الأحلام
بحلم ابقى غني
بحلم ابقى مثقف
بحلم ابقى مشهور
وبحلم بواحدة أحبها
زيي زي اي شاب
بس انا عاوز اقولك بقى يا زميل
ان النوعية دي من الأحلام كلهااااا بقت اوهام

لأنك عشان تبقى غني محتاج شغل ودلوقتي مفيش اكتر من البطالة
اللي بيبتليه ربنا بالتخرج من الجامعة بيلاقي غول البطالة بيفترسو

وعشان تبقى بني آدم مثقف محتاج تعليم كويس
وده طبعا من رابع المستحيلات
لما تلاقي كام ألف مدرسة لا تصلح للإستخدام الأدمي
والفصول شبه المعتقلات
وفي سجان بيقتل التلميذ اللي ينرفزه

وعشان تكون مشهور محتاج فرصة حقيقية يضمنها مبدأ تكافؤ الفرص
وده طبعا مش موجود أساسا

أما الحب وما أدراك ما الحب فهو يا عزيزي الأندر في هذا الوطن و في هذه الحقبة
دلوقتي كله بيدور على المصلحة

الحلم المنطقي الوحيد
هو انك تحلم انك عايش
ومن غير ما تحدد نوعية العيشة دي
عايش وبس
مش اكتر من كده

امممممم عشان بس ما أسودش الدنيا
ممكن تحلم ... اقصد توهم نفسك
ان أحفادك لو جم أصلا
ممكن يعيشوا احسن منك
عفوا لقد نفذت أحلامكم

أما للحياة ان تحن على الضعفاء
يميل بنا قاربها في بحرها
موجها يعلو ... ويعلو ... ويعلو
اراني اجاهد بين العواصف والامواج
نور قد بزغ في السماء ليهديني
رأيته
مددت يدي لأدركه
ضاقت المسافات وزالت العقبات
الأن قد بلغته
نور أم نار هذا ما سأدركه

نضال مواطن

قالتلي ليه عملت فيا كده
قولتلها بصي انا معملتش حاجة ف حد
ومش فضيلك لا اتنين ولاسبت
وبعدين ... مش بإيدي يا نفسي
هي الامور ماشية كده
وحالي ,انتي عارفة , مايسلمشي
بصيت لروحي وقولت
فات القطر
لا صبرت ولا نولت
خليك كده قاعد كده
لا انتا مرتاح ولا قادر تبدأ السطر
حاسس ان امورك كده
على بعضها
ملخبطة
والحالة مهياش كده
متبعترة
كله بإيدك
انتا اللي كسرتها
ونسيت قديمك
ورميت جديدك
ولا كسبت نفسك
ولا كسبتها

..

بتقولي .. ساعتها سمعت صوت من بعيد
جي من هناااااك ... من قداااام
بينده ويقول
انا شاب لكن عمري ألف عام
عايش لكن بين ضلوعي زحام
خايف ولكن خوفي مني انا
أخرس ولكن قلبي مليان كلام

...
حسيت اني دخلت في السياسة
وسيبنا السهوكة والمياصة
قولتلها بصي
انا مليش في الكلام الكبير
خليني هنا مخبي راسي في بير
وشغل النضال والفياصة
سبناه لأهل الفهم والكياسة

...

ورجعت وبصيت لروحي وقلت
يادي الحوسة
ده انا روحت
ده انا مفيش خلاص
انا تقريبا مش موجود
غالبا السر الالهي نفد للخلاص
قرصت نفسي وبصيت لروحي تاني
ولقتني لسه بحس
اومال ليه عقلي نخره الدود
ليه مش عندي استعداد أنادي

...

قولتلها بصي
سبيني في حالي
انا بجري ع رزق عيالي
ومش فايق
اه ... اصل لا مؤاخذة مدفعتش الايجار
ولا ابونيه الجزار
وعم عبد الغفار ... الخضري
اي نعم
مشتري منه تلاتة اربعة كيلو بالتقسيط
والحالة شيش بيش
ومش رايق
لغلاء رغيف العيش
ومش فاضي للزوار
وما تقوليش انتحر
لأن اخر خبر
ان في ضريبة انتحار

ميثودولوجيا

تدلى أمامه ... غرفة مظلمة ... ينظر عبره إلى مستقبله ... لا جديد ... قرر أن يخرج
وينهى المنافسة ...



في واقع الامر لقد استنفذ جميع الفرص ...

هو يحاول فقط أن يتجمل أمام حتفه ...

؟؟؟

الأمر مريب ... جدا ...

الصمت يحدثه ...

نعم .. نعم .. الصمت يحدثه ... لا لم تخطئ القراءة

ماذا قال له ؟؟؟

لا أدري .. الأمر لا يكاد يعقل

خارج نطاق الجاذبية ... ومدارات المنطق والعقل

بدأت أحداث قصته ...

في عالم اللا شيء
حيث منتهى اللامنتهى
قضى عمره في فترات سرمدية
خالدة
ورغم هذا

قرر أن ينهي اللعبة

ويعلن الانسحاب

فالأمر لم يعد بيده

....
..

يتدلى من السقف ..

وقد انقطعت انفاسه ..

هو فقط يعيد تهيئة ميثودولوجيته في الحياة

المزيرة

قررت اتكلم النهاردة بما اني واحد مصري عن المزيرة

بإختصار عشان ما أطولش عليكم المزيرة دي عبارة عن حفرة عميقة جدا قرب ساحة شعبية
إسمها ستاد الجبل ودي موجودة في المقطم وملاصقة للأسوار القديمة للقلعة
ويقال انها كانت جزء من القلعة زمان

عموما دلوقتي المكان ده بتتحكي حوليه قصص كتير
والناس مؤمنين بيها
يمكن كمان عشان يخوفوا العيال

يعني من ضمن الحاجات اللي اتحكت عن المكان ده
ان في واحد وقع في المزيرة
وقعد فترة محدش سمع عنه خبر
لحد ما طلع في يوم وهو ما بينطقش
دخلوه المستشفى وبعد ايام مات
غير روايات وروايات حولين ناس وقعوا في المزيرة دي وماحدش سمع عنهم تاني
واللي شاف عفاريت طالعه منها
واللي شاف ... واللي سمع .... وقصص وقصص

المزيرة دي بلعت جواها أطفال وشباب وشيوخ بأفكارهم وأحلامهم وأمالهم
بلعت جواها من كل شيء
بلعت جواها لحد ما ربت الرعب للناس
ومحدش بقى يسمع سيرتها إلا أما يتفزع

بسسسس ....
مش أهل ستاد الجبل بس اللي عايشين في خوف من المزيرة
لأننا كلنا موجودين فعلا دلوقتي في مزيرة
كلنا خايفين نتكلم لمزيرة المجتمع تاكلنا
التفكير المتجمد وعادات وتقاليد الجاهلة مكتفانا لدرجة اننا بقينا عايشين في مزيرة وهنفضل عايشين فيها طول العمر خايفين نفكر ... خايفين نغير من عادات وتقاليد سوست ... خايفين من اي حاجة
مش مصدق ؟؟؟
طب بص على تراثنا الشعبي الأمثال والأقوال المأثورة
الخوف نص الشطاره ... الهزيمه مع السلامه غنيمه ... اللي ما انتش قده ماتوقفش ضده ... تربس بابك بالضبة ونام واستخبى ... مية كلمة جبان ولا قولة الله يرحمه
وغيره وغيره من الأمثال الإنهزامية اللي بتدفن دماغك وبتقتل اي روح للطموح جواك
المزيرة مش بس حفرة في المقطم
المزيرة حفرة في مجتمعنا ويمكن ... ويمكن تكون هي مجتمعنا
المزيرة هنلاقيها في عقائد شعبية احنا متمسكين بيها لحد دلوقتي عشان ننام ونأنيح في المزيرة أكتر وأكتر وعلى رأي العظيم اللي قال عيش ندل تموت مستور
أشوفكم في فرصة افضل من كده
نكون فيها كلنا ... بره المزيرة

القدوة

سؤال شاغل بالي من فترة .... يعني ايه قدوة ؟؟؟

سألت السؤال ده كالمعتاد قبل ما بجهز أي أيتم الأصدقاء المنورين دايما

سألت الواد شيكو قالي بص يا بوحميد

القدوة هي شخصية انا شايف ان كل تصرفتها صح وشايف انها مثالية وصعب انها ترتكب أخطاء

سألت علاء قالي رأي يستحق عليه جايزة الدولة التقديرية ... قالي القدوة هو المثل الأعلى

ودمتم ... نورت المحكمة يعني ...

بصراحة كده انا شايف القدوة مش لازم يكون شخص متكامل الأوصاف

والمعنى المثالي و المثالية الأفلاطونية في النظر للمثل العليا ده مش شيء ضروري

صحيح انه شيء جميل اننا ناخد المثل والرموز الدينية كقدوات

لكن كل واحد أولا وأخيرا محتاج مثال حي قدامه ... ومستحيل يلاقي في الزمن ده وما بعد مرحلة الأنبياء

حد كامل فالعصمة للأنبياء ...


وبالتالي ده يحطنا أمام حقيقة وهي ان القدوة مش لازم يكون حد مثالي شخصية لا يصدر عنها خطأ أبدا

إذن مين يستحق يكون قدوة ؟؟؟

ده السؤال اللي وقفني

السؤال ده اكيد كنت هلاقيله حل لو مجتمعنا فيه من يستحق لقب قدوة ... وخلينا معلش نطلع بره نقطة القدوة العائلية والأب والأم والأعمام ... انا هنا بناقش القدوة اللي شباب مجتمع ما ممكن يمشوا على خطاه

وحتى لو توافر القدوة ده ... فالشخص ده لا يكرم بل بالعكس بيتبهدل وبيطلع عينه وعين اهله ... ليه عشان تجرأ

وبقى شخص نضيف ومحترم

دلوقتي المجتمع بقى يوفرلنا قدوات عظيمة تعتمد على استراتيجية الهز والرقص

بقى أفضل حاجة ان الشاب يبص لأبوتريكة على انه قدوته لأنه الشخص الوحيد تقريبا في المجتمع المصري اللي

محترم وواخد حقه إعلاميا تالت ومتلت

دلوقتي فعلا مجتمعنا بيعيش حالة فراغ من القدوات إلا من رحم ربي

انا مثلا الاقي دكتور كل وظيفته انه يقول انتم جيل فاشل وانتم جيل منيل وانتم وانتم ع اساس ان جيله كان بنى حاجة احنا نكمل عليها

دلوقتي أغلب الناس اللي ف مركز إجتماعي مميز ف المجتمع بتاعنا ده أشبه بحاجة سخيفة جدا ملهاش لازمة في الدنيا غير انتقاد الشباب واحباطهم

أنا واحد مصري وبدور ع قدوة ... ولو مفيش في مصر ... هستورد