أنا

أنا الشعب والشعب أنا
أنا الزمن فات عليا بميت سنة
أنا بفضل زي ما انا
لا بتغير ولا بعجز ولا همشي من هنا

أنا التاريخ أنا الحضارة
أنا السياسة والإدارة والتجارة
أنا الشوارع والكباري
والحارات حتى القهاوي

أنا كل حاجة وكل حاجة هي أنا

لابقدم ولا بتجدد
لابقلق ولا بتهدد

أنا الهرم وأنا السد
أنا اللي ما هيبقى زي حد
أنا اللي يتهد الجبل
ولا عمري بتهد

أنا يا سيدي معضلة الإنسانية
أنا أي حد وأي حد تابع ليا
انا مثال للديموقراطية
أنا رمز الأغلبية
ونصير الأقلية

أنا الأحزاب ... الجماعات
والمؤسسات ويا التنظيمات

أنا ببساطة وبإختصار
انا يفضالي مليون مطار
أنا ممثل كل الأحرار
انا كل حاجة وكل حاجة هي انا
انا فوق الكل بإقتدار
انا لا بتهز ولا بنهار
انا مقاوم للزلازل والإنفجار

انا مصلحة الوطن
انا صاحب المنن
انا ولي النعم
انا من ملكي ع الشعب
بأفيض بكرم

أنا الخطيب في المساجد
والواعظ في الكنايس
واللي يخرج عن نظامي
يبقى لايص لايص

انا الراديو والتلفزيون
وقبل الماتش أعرف
مين هيجيب الجون
انا مليش غير قانوني قانون

انا كلي نعيم
انا اللي يخالفني
يبقى مثواه الجحيم
انا يا صديقي ...
....
..
انا الزعيم