قرأتها وقلت أحيه

قرأت اللنك ده ( مكبر الخط عشان ما تقولش ماخدتش بالك ) وبعدها وجدت نفسي لا إراديا أقول أحيه - وهي كلمة ليست بأبيحة في التراث السكندري - ايه ده كلووو
ايه اللي اانا شايفه ده كلو مش ممكن ... بناكل خنازير
الله يا سلام على الجمال
يعني ممكن إذ فجأة كده ألاقي دودة شريطية بتلعب ف مصاريني

يعني قلة الضمير خلاص خوخت وسوست في مجتمعنا الله يحرق المجتمعات القذرة اللي بالمنظر ده
مش ممكن
كل واحد همه انه يكسب وخلاص
يعبي فلوس في كرش أهله وخلاص

واحنا اللي علينا الحكومة الحكومة
طب ما في كلاب وسطنا نرميهم الاول بره المجتمع بتاعنا
وبعد كده نقول الحكومة

يعني على سبيل المثال
البلد كتر خيرها عملت مشروع ابني بيتك
الجزمجية غيروا النشاط وبقوا مقاولين في المشروع ده
يجي الشاب من دول معاه تحويشة العمر والتاني يستغفله ويبنيله اي حاجة في اي حاجة
ويفاجئ المسكين بعد الدور الاول ان البنا ده لا يصلح للسكن
ومحتاج هدم
وممكن تفوت عليه المهلة وتتسحب الارض منه
ليه بسبب واحد معدوم ضمير
همه ف كرشه

الغريب انك تلاقي رغم ده ناس لسه بتروح للنصاب ده
عشان ينصب عليهم بردو
طب انتو فين ما تصحوا كده
حد يروح يبلغ ولا ع الاقل بطلوا تتعاملوا معاه

ما علينا من لحم الخنازير - وكان الله بالمؤمنين رحيما - انا المقطع اللي مزجني أوي أوي
وعمل معايا أحلى واجب
المقطع الاخير ده :-

وأخيرا .. هذه رسالة وردت إلى منذ فترة طويلة من أحد الأصدقاء عدد فيها صور الغش التي يعاني منها المواطن المصري يوميا بسبب سلبيته واستهتاره بصحته:

- عصير المانجو في أغلب محلات العصير .. 70% منه قرع عسلي ليعطي ملمس المانجو وقليل من العصير الحقيقي .. لزوم النكهة!

- اللانشون والبسطرمة.. عشرات الدراسات تؤكد يومياً أنها مكونة من فول الصويا أو بقايا اللحم المخلوط بكية هائلة من مواد النكهة كالثوم والحلبة

- عندما تغلق وزارة الصحة أو مباحث التموين أو غيرها من الجهات أحد المصانع المخالفة ينتهي الأمر بصاحب هذا المصنع إلى غرامة بـ 10 الاف جنيه أو حبس سنة وغالبا ما يدفع الغرامة ليخرج يواصل عمله في مكان جديد

- مؤخراً تم اكتشاف أحد مصانع ألعاب الأطفال تقوم بحشو الألعاب بالقطن المستخدم في المستشفيات .. رغم أن هذه المخلفات الخطرة لها قمائن يتم فيها إعدامها .. فكيف تسربت إلى هؤلاء؟

- جامعو القمامة يقومون ببيع الحقن وغيرها الى أشخاص يقومون بغسل هذه الأدوات وإعادة تعبئتها وتغليفها وإعادة بيعها بالأسواق

- الحلاوة الطحينية .. يضاف إليها مادة أكسيد التيتانيوم لتعطيها لونا فاتحا، بل إن البعض يقومون بإضافة الدقيق والمواد المالئة إلى السمسم .. ومين هو المواطن دا اللى يستاهل نعمل له حلاوة مصدرها السمسم 100%؟

- سمك المزارع السمكية.. يتم إطعامه الدم المجمد ومخلفات عمليات الذبح لينمو بسرعة

- الجبنة الرومي القديمة.. لا قديمة ولا يحزنون .. فهل سيصبر المنتج على قرص الجبن 3 أشهر حتى يتم تعتيقه لسيادتك ؟ يضاف إليها هيدروكلوريد اسيد تركيز 30 %.. أي 10 لترات لكل طن لبن وتعتق في مكان مظلم مغلق تمامأ لعدة ايام فقط .. وتذوق أفضل جبن معتق .. بيسلع!

- الأكياس البلاستيك السوداء .. مصدرها مخلفات المستشفيات والمراكز الطبية (حقن - سرنجات - كانيولا - فلاتر - اكياس دم مستعمله - قساطر بوليه مستعمله..)

- بعض عبوات المياه المعدنية .. ليست مياه معدنية !! بل إن جهاز حماية المستهلك كشف في إحدى القضايا عن أن شركة ما كانت تقوم بتعبئة العبوات من مياه الصنبور وتضيف إليه بعض المركبات، وشركة أخرى تقوم بتجميع بخار الماء الناتج عن إحدى العمليات التصنيعية لتكثفه وتعبئه في زجاجات على أنه مياه معدنيه .. حاجة ببلاش كدا وفلوس من الهوا!

وقال ايه بنعيا ليه
وقال ايه الشعب عيان ليه
يا خي أحيه
- بأعتذر للناس اللي عندها حساسية من الكلمة دي -
الغريب ان مفيش حد بيتلكم

لازم نعمل حاجة يا جدعان
مش هينفع كده
كل واحد هيفضل ساكت ويعمل نفسه عبدو مش واخد بالو
واحنا نتحرق
لا
الدولة عملت اللي عليها وعملتلنا جهاز لحماية المستهلك
وقت ما تكتشف اي حالة فساد قولهم
وكده انتا عملت اللي عليك

جهاز حماية المستهلك:
96 شارع احمد عرابي .. المهندسين
الخط الساخن (من 9 صباحا الى 5 مساء) 19588
تليفونات أخرى: 33055762 -33055765 -33055768

خليك إيجابي أبوس إيدك