نقطة ومن أول السطر

الشباب نفسه مش ف شقة لا ف قصر
والمشاكل الي عليهم فوق العد والحصر
وبردو شباب سلبي قاعد ع القهاوي
لا عنده إرادة ولا يوم ناوي على نصر

نقطة ومن أول السطر

نزلت مشيت في شارع الهرم
حيث مسقط رأسي والخلق بقى أمم
لقيت الدنيا نيلة والشارع اتبرم
شباب في ديسكوهات وسلملي ع المحترم

نقطة تانية ومن أول السطر

هل العيب فينا
ولا الناس اللي فوقينا
نسيوا ان احنا فينا
أمل ليوم بعدينا
وشفطوا كل حاجة
ونسيوا يسيبوا لينا

نقطة تالتة ومن أول السطر

حاجة فعلا مريبة
حاجة فعلا غريبة
اما الخير يبقى
في ايد الفقير عجيبة
وتلاقي الناس تتحاكي
ويصبح بين يوم وليلة
أفاك حرامي منافق ومنيل بنيلة

نقطة رابعة ومن أول السطر

شاب كول
مبتسم على طول
بيتفرج على ميلودي
ودايما يقول
بيس يا مان انا كول
على طول

نقطة أخيرة ومن أول السطر

شاب مستني دوره في الجيش
وبيدعي يقول يا رب ما يجيش
تلات سنين ضيعين على مفيش
بيحب بلده موووت عليه ما تفتريش

نقطة ومن أول السطر