Jan 31, 2009

كنترول زد

ساعات كتير وانتا بتحلق دقنك بمكنة حلاقة من النوع القذر اللي اسمه لورد ده ام جنيه ونص
تكتشف انك إرتكبت حماقة وشلت حتة م السالف بمنتهى الغباء بوظت على التحديدة إللي انتا شقيان فيها
بقالك بتاع نص ساعة على مراية مانتاش شايف منها اي حاجة اصلا
وتفتكر قعدتك ع الكمبيوتر وتفتكر اما تعمل حركة غبية زي كده وتدورس كنترول زد
يعني مثلا تقعد تكتب بحث عشر ورقات وتمسحه غصب عنك " وركز في غصب عنك دي " تروح دايس
كنترول زد

الشعور بالرغبة في التراجع عن حدث معين في فترة معينة من الماضي
تفتكر انك قعدت طول التيرم تلعب وتهيص وتلف ف الشوراع ومقضيها ستميشن وبلاستيشن وكورة في الساحة اللي على ناصية
شارع بتكوا
وتيجي الجامعة مقضيها ف تل ابيب وجومانة وتجارة وعند عم احمد ف السايبر اللي ورا الجامعة ناحية المنشية
إذ فجأة ليلة الإمتحان تكتشف إنك طالب مقصر
وإنك تستاهل الدبح على اللي انتا بتعمله ده وانك ما تستاهلش ولا مليم م اللي بتاخدهم مصروف
وانك عاوز تتراجع عن كل الحماقات اللي اتركبتها خلال السنة كلها عشان تقدر تذاكر وتبقى طالب مجتهد

على فكرة الشعور مش بيجتاحك انتا بس
لا ده انا وانتا واللي بيقرا معاك نفس التوبك في نفس اللحظة اللي انتا بتقرا فيها التوبك ده
وحتى اللي شاف التوبك من بره ونفض وكبر دماغه ومارضيش يدخل
بردو حس بنفس الشعور ده

كلنا جت علينا لحظة معينة حسينا ان احنا محتاجين نعمل كنترول زد لحاجات كتير في حياتنا
محتاجين نعمل Undo كبير جدا لبتاع زيليون حاجة ف حياتنا

الغريب بقى والحاجة المملة جدا تلاقي واحد عارف انه حياته كلها اصلا مش محتاجة كنترول زد وبس
لا دي محتاجة Shift Delete أو محتاجة Formate بس من العيار التقيل
ويتسطبله نظام تشغيل من اول وجديد
بس يحاول يمنطق التخلف اللي هو عايش فيه ده

صحيح كتر الإحساس بالندم وحش وزي ما بيتقال لو تفتح عمل الشيطان
بس في نفس الوقت التكبير والتنفيض وحالة العبط والعته للحاجات الكتير الغلط اللي بتحصل حولينا
دي أخطر وأسوء
يعني مثلا تلاقي واحد بيشرب سجاير تقوله يا أخي ربنا يكرمك وتبطلها ... يقولك آآآآآه الملعونة بت الملاعيين دي اللي مبوظة صحتي
طب يا عم الظريف لما انتا عارف وعارف ان هي حرام ليه بتشربها
تلاقي بقى ردود تشل
من نوعية
ضغوط الحياة
زعل
البيت
أمي
ابويا
حاجات زي كده من الإجابات اللي تخليك تبقى عاوز تعيد الطعم بتاع شلل الأطفال عشان تطمن على نفسك

طب انتا يا إبني مش ندمان غلى صحتك وعلى الحرق اللي بتعمله ليها ده
شيء يستفزك بجد

انا مش عاوز اطول عليكم اكتر من كده وتقولوا تلقيح جتت والكلام الظريف ده
انا عارفك يا لئيم اصلا بقالك نص ساعة عمال تنعل الكلكاية اللي دوست بيها على لنك التوبك ده
بس يالا استحمل يا بطل
السجن للجدعان
كفارة
خلص التوبك

No comments: